Mu matora y’Abasenateri yabaye muri Nzeri 2024, Ihuriro ry’Igihugu Nyunguranabitekerezo ry’Imitwe ya Politiki, ryohereje indorerezi 62 zakurikiranye imigendekere y’ayo matora yabaye ku matariki ya 16 na 17 Nzeri 2024. Muri iki gikorwa Ishyaka rya Gisosiyalisiti rirengera abakozi mu Rwanda (P.S.R), ryohereje intumwa 5 muzari zigize indorerezi z’Ihuriro.

Mu butumwa bwazo, buri ndorerezi y’Ihuriro yasabwe kwambara umwambaro uyiranga n’ikarita y’indorerezi (Badge) yatanzwe na Komisiyo y’Igihugu y’Amatora yagombaga kwerekana igihe bibaye ngombwa.

Ubutumwa bw’indorerezi z’Ihuriro bwakorewe mu matsinda. Hakozwe amatsinda 30, buri tsinda rigizwe n’abantu babiri (2) baturuka mu Mitwe ya Politiki itandukanye, nibura umwe (1) muri bo akaba umugore. Buri Mutwe wa Politiki wayoboye nibura amatsinda abiri (2). Ikindi ni uko buri tsinda ryakoreye ubutumwa bwaryo mu Karere kamwe.
Muri iki gikorwa, Umunyamabanga Nshingwabikorwa w’Ihuriro niwe wari Umuhuzabikorwa w’ibikorwa by’indorerezi z’Ihuriro, naho Umuvugizi w’Ihuriro akaba Umuvugizi w’Indorerezi z’Ihuriro.

Mbere yo gutangira ubutumwa bwazo, buri ndorerezi yahawe ibyangombwa byayifashije kurangiza neza inshingano zayo, birimo ikarita iranga indorerezi (badge) yatanzwe na Komisiyo y’Igihugu y’Amatora; urwandiko rw’ubutumwa bw’akazi; amabwiriza ya Komisiyo y’Igihugu y’Amatora agenga amatora y’Abasenateri yo muri Nzeri 2024, n’amabwiriza yihariye y’Ihuriro agenga indorerezi zaryo.